Nanwarciar
Nuratar:
Nanwarciar, imna ingrim kangrakun pilria, kangrakun nanwartaleg penatun qertutalriameg. Tawa Nanwarciar tawa-i. Tawa tar iluturwarngami Nanwarciarullinilria, camawet allgumakutaga, allganrur-kur tawa-i camawet Penalegtun. Ingrit nacaqtarluku kan'a nanwaulliniur pen'auluni.
Uyuruciar:
"Cumiktulqanka cunera'arat qussngissut mat'um awaatineg. Una-ggur em'er, qantut camagun cupssarangqerniluku unawet imarpigmun. Neryuniurtua Nuratankugnun Kalirmiumun-llu kangirqutevyaaruteknayukluku. Umyuggiurtua ungalalirnaranun mat'um Nuniwam piyukluku. Ungalam arrninran tung'ini pekcesiyaksatua matumi qikertarmi. Ayemqatulrussaqaqa, tauggam angayuqagka cullrunritug tam'ani. Taumeg qanrutelguitamken castun ayuqelra tamana".
"Ak'allarmeg qanengssitangqertur. Tamatum awaatini qantut malrug cuugeg qawartallrunilukeg Nanwarciam cen'ini. Aapag at'errluuni mertalliniyalrim qaltass'i anuqem tengtelinia Nanwarciam quk'anun. Uksuarmi taukug uterqartelukeg cuut cenarraryalriameng, wiilusurluteng Pengurrlaggni, illit alaqutliniur taum qaltassim ayuqnguaraneg.Tengtellermeg tawani Nanwarciarmi. Ciuliaqatut-llu umyuggiungluteng ukinengqerrsukluku imarpigmun piaken Nanwarciarmeg. Taumeg tawa qaltayagmeg kangilirluku pilliniat. Ciuliaqatut qayutun yaqsigtallraneg nalluat cuqcisuilameng, tawaken Pengurrlaggneg. Tamatum nall'ini cuqyutaatelrut. Tauna tawa qanengssiu-ggur".
Kalirmiu:
Qecig tauna qaltayag teguyarerluni, ssimameg uqamalkucirluku uss'armeg-llu uskurirluku kalevtelliniluku. Etranun tucetengnaqvagyaqitni tut'enritliniur. Uss'ateng nurngan imlliniat.
"Nanwarciar tawa nanwauyaqur, tauggam kuangni etuqapiartur. Qanrutektuat ak'aurtelria kuani nanwarmi cunerra'arat wigtualuteng atralliniut ciku qecigturiwalgan. At'erluteng cikumi anluiluteng kalevtelliniat qecig qaltayag.
Ellakenrilngukutagtut taukut cun'errat. Paqumikluku castun nanwam etra ayuqelra emrem-llu neqnirtacia. Tauggam tauna qaltayag qasqipaalegmi kevkautelliniluni, kill'uni-llu. Kinguksagucaqi, upnerkarluni-llu tauna qaltayag alaqliniat cenameg. Teplin'ia qaugyarmun neglirneranun Cingigglim.
Alaqliniluku tauna qaltayag, qaqilluteng-llu liitaqluku. Taumeg atuqallermegneg picurluteng ukinengqersukluku pilliniat Nanwarciar imarpigmun. Taum emrem qusigtacia qusigtakutagtur imarpigtun. Tawaten piyukluku piaqa, ukinengqerkutagtur imarpigmun">.
"Tawawet Nanwarciarmun ak'aurtelria, cun'eraarat Narulkirnarmiuneg qanrutlinit tangersartusqeluku. Qanrulluki qayutun et'utalra wigtuasqeluku. Cun'eraarat quyaqerluteng ayaalliniut. Ayagpalgata qaltayagmeg (Mingqameg) cali uss'armeg pinevkarameg cikilliniluki.
Ciuliaqatut alangallrukutagtut tawani, tauggam nalluanka ilagalrunrilamki. Tam'ai Angutepit ciuliaqatut qanrutektullruit. Angukarrat tuyuqelrullinit tawawet et'utaassisqeluku , cun'eraaraulrukutagtut. Qaltayagmeg cali uss'armeg pinevkarameg cikirluki. Taukut tawa cun'errat tekicameng tawawet anliilliniut, kalevluku-llu. Qaltayag ssimameg uqamalkucirarluku, tauggam etranun tut'enritliniur ".
"Piuraanarluku tawa qaltayag nuculliniat. Kuaten qanrutkelruat, cunera'aratam aqvalirturluteng cikum qaangakun nucullrukutagat tawaken nanwarmeg. Nucugnginanratni uss'ar kevkarluni piyalria qaltayag tauna kit'elliniur. Uksuarkarluni qakemna, nenglengluni, qumulluni-llu. Nalluyagutelliniluku-llu uksur taktacian".
"Kiagluni piyalria tauna qaltayag teplinia Pengurrlit caangatnun. Taukut tawa wigtuastaita kic'iluteng-llu pillret liitaqliniat tauna qaltayag, cali usskurangqelliniluni. Tawaken ayagnirluku cuut ukvekengliniat ukicimayukluku Nanwarciar imarpigmun. Tauggam pic'iurteqaapiarluku pinritliniluku, ciuliaqatut pic'unrilngurmeg qaneryarameg ayagniryussuilameng. Nanwarciarmeg Piyuklukuarturluku-kis ukinengqersukluku piluku imarpigmun. Tauna tawa qaltayag mallukngamegteggu Pengurrlagneg. Tawaten qanrutkevkarluku niitellruaqa".
"Niiqarluku kass'at cuvrilqeliniat, pic'iutassagluku cup'it qanelrat. Nunameg qinertartet cuvrillruliniat et'utaasigluku, qerrutulimeg angyarluteng. Picimeg-llu imarpim qaangani et'unruliniluni. Tamana-llu nissnginaarluku pilqaqa ilagalrunrilengramki. Nalluqeraqa cami allrakumi pillrat, 1964ankug 65'am-llu awaatini pikutagtur. Tawaten tawa una qanengssi taktaur".
Tutqir:
Atam tayima kuigyanraartanqertur caniqerani taum nanwam. Piugluni at'erluni meqsarturnarqeluni. Qussngisuullemni tawaken meqsartullrunga. Ac'ianun kanawet at'ernarqur, tawa pinarqeliniur, tauggam alingnarqesukluku piaqa qertuluni pen'aungan. Cenaaraunani-llu Akiwignankugtun, Penalegtun-llu.
At'aucimi at'eryalriakut ac'ianun, aciqssigwartur, at'ernarqelliniluni kanawet kengllilluku. Qanrutektuat qaltayagkur ivkaryaqitni tawani Nanwarciarmi alaqelrulliniat Pengurrlagni.